ياللى سعادة الدنيا بقربك
إياك تهجر أو تسلاني
البسمه تفارق أحلامي
و العمر فى بعدك ينساني
الوحدة تغيم على روحي
السهد يصاحب وجداني
ياللى وجودك يبقى الجنة
وتعطر زهرة بستاني
ياجمال الكون لما بتضحك
النجم فى ضيك بيلالى
والسما تتوضى من كفك
وتطرز بالحلم أماني
الشمس مكسوفه منك
لما ظهرْت يا عمرى الغالى
بتدارى ف نورك الوردى ..
وتغيب تستناك لليالى
تشحن روحها وبيك تتباهى
وتقولي أحلو زماني
أمسك خيطها دفى قلبك
بشعاعها وإحساسها الحانى
تلقى الكون بيغني معاك
وبيغزلك توب السعد ..
أخلع ياللا جميع أحزانك
قرب ماتفكرش فى حد
عيش يومك بجمال الفكره
عيش اللحظه بروح الفطره
حب بجد ..
عيش زمنك عيشني زماني
د اللحظة لو راحت منك
صدقني ماهترجع تاني
ومش هتلاقي لصوتك رد
